Орусия менен Украина кезектеги жолу туткун алмашты.
Азырынча канча киши алмашылганы тууралуу эки тарап тең маалымат бере элек.
Алмашуу 26-июнда ишке ашкан.
25-июнда Орусиянын Ростов-на-Дону шаарындагы аймактык аскердик сот Казакстандын 19 жаштагы жараны Туран Устюговду “террордук уюмдун аракеттерине катышкан” жана “террордук аракеттерди ишке ашыруу үчүн окуудан өткөн” деген айыптар менен 12 жылга түрмөгө кести. Бул тууралуу “Азаттык Азия” анын апасы Элмира Жанабаевага шилтеме кылып жазды. Прокурорлор казак жаранын 25 жылга эркинен ажыратууну соттон өтүнгөн болчу.
«Ал эч нерсе кылган жок. Болгону ниети үчүн ага абак жазасын берип коюшту», - деди Жанабаева.
Ал уулу согуш башталгандан бери Телеграм аркылуу белгисиз адамдар менен байланышып, согушка баруунун жолдорун караштырып жүргөнүн, Украинаны коргоо керек деп айтканын кошумчалады.
Маалыматка ылайык, Туран 2024-жылдын 27-сентябрында Алматыдан чыгып кеткен. Казакстандын Улуттук коопсуздук комитети ал ошол күнү Кыргызстандын аймагына өтүп, андан ары кайда кеткени белгисиз болуп жатканын апасына билдирген. Беш күндөн кийин Туран Орусия аннексиялаган Крым жарым аралында кармалганы белгилүү болгон.
Орус тергөөчүлөрү Туран украин күчтөрүнүн катарында согушууну, Крым аркылуу Украинанын негизги аймагына өтүүнү көздөгөнүн билдирүүдө. Алардын айтымында, Турандын телефонунан Орусияда террордук топтор деп таанылган, Украинанын куралдуу күчтөрүнө байланышы бар деген «Орустардын ыктыярдуу корпусунун» жана «Азов» полкунун анкеталары табылган. Бул маалыматты көз карандысыз булактар аркылуу ырастоо мүмкүн эмес.
Буга чейин Казакстандын Тышкы иштер министрлиги Туран Устюговдун иши боюнча Орусиядагы жергиликтүү мамлекеттик органдар, адвокаттар менен байланышта экенин билдирген.
«Бул аймакта Казакстандын өкүлчүлүгү болбогонуна байланыштуу аны менен адвокаты туруктуу байланышта болуп жатат. Учурда аталган жаран өзүнүн абалын канааттандырарлык деп баалайт жана саламаттыгына байланыштуу арыз-дооматы жок», - деп маалымдаган Казакстандын тышкы саясий мекемеси.
Европа кеңешинде Орусиянын Украинадагы согушуна тиешеси бар жетекчилерди сот жообуна тартууга жол ача турган атайын трибуналды түзүү тууралуу макулдашууга кол коюлду. Бул документке 25-июнда Страсбургда украин президенти Владимир Зеленский менен Европа кеңешинин баш катчысы Ален Берсе кол коюшту.
Бул трибунал Украинадагы согуштагы “агрессия кылмыштарын” иликтеп, президент Владимир Путинге чейинки орусиялык аткаминелердин жоопкерчилигин карай алат.
“Ар бир согуш кылмышкери адилеттик орной турганын билиши керек жана бул Орусияга да тиешелүү”, - деп билдирди Ален Берсе макулдашууга кол койгондон кийин.
“Орусиялык ар бир согуш кылмышкеринин, анын ичинде Путиндин жоопко тартылышы үчүн бекем саясий жана юридикалык эрк керек”, - деди Зеленский.
Орусиянын бийлиги бул макулдашуу тууралуу комментарий бере элек.
Бул Европа кеңешинин көзөмөлүндөгү алгачкы атайын трибунал болуп калмакчы. 46 мамлекет мүчө болгон Европа кеңеши Европа Биримдигинин бир бөлүгү эмес.
Кеңешке Түркия, Британия, Украина сыяктуу Евробиримдикке кирбеген мамлекеттер да мүчө. Москванын Украинадагы согушу башталгандан кийин Орусия Европа кеңешинен чыгарылган.
Украинанын Днепр шаарында Орусиянын соккусунун курмандыктары көбөйүп жатат. Чабуулда каза тапкандар 20га жетти.
Днепропетров облустук аскердик администрациясынын башчысы Сергей Лысак 26-июнда эртең менен Самар шаарында дагы эки киши каза болгонун билдирди.
Кечээ ал 24-июндагы соккулар Днепрде 19 кишинин өмүрүн алып, 300дөн ашууну жараат алганын айткан.
Днепрде чабуулдан кийин көп сандаган турак жайлар талкаланган, Одесса-Запорожье багытындагы поезд да соккуга туш болгон. Киев Москваны карапайым тургундарды, жарандык жайларды бутага алганы үчүн айыптап келет.
Орусия тарап чабуулдар тууралуу комментарий берген эмес.